hallo liebste kakteeinnen und gegärtnerte(gekakteete, bekakteete und verkakteete het nid so toll/nätt tönt...)
wie dir vilich aui gmerkt heit bini nonie aawäsend gsi a irgendwelche aktivitäte vo de pousis! *grosses schäm* (oder vilch ou nid so gross)
das liit eigentli einzig und elei do drann, dasi im momänt im honigfluss vom schoggiläbe-land schwümme! auso i bi jo iz 4 monet z ängland gsi... dert hani so einiges erläbt... hie vilich es paar sache zum di gschicht mitem gruusige outo und de komische koschtümierte no witerzfüere:
nach eim monet im süüde (mit däm wüeschtling und de koschtümierte) bini de i norde züglet - auso vo taunton uf leeds, für die wos gnau weu wüsse...in leeds hani immerno di gliiche längwilige arbeite wi `züüg iiordne und teilinummere iitöggele` müesse mache... ABER de ganz räscht isch super gsi! gwohnt hani bire nätte aute dame "auch granny genannt"... (auso eigentli isch ire name lynn) di het AUES! gmacht für mi!! und gfeisset hani bi dere... uiui... s nachtläbe dert isch unüberträfflech! dert würds so mängem schwiizer kampftrinker ou gfaue! i usgang geit me normalerwiis donnschti und samschti.. donnschti isch studänte nacht, das heisst ei drink choschtet umgrächnet 1.80 CHF!! und sogar am ne samschti umgrächnet nume e füfliber! dir chöit nech äuä vorsteue dasi de iz das jahr cha mithaute wemer de mac es bündner röteli vorsetzt :) (nid wi ou scho...) - und das wäri ou d erklärig wiso aui, oder emu seehr vili, so feiss si in england!
es git ou ke autergruppe oder gränze, mi mues eifach 18i si und de geiz ufwärts bis minimum 55i... dä club wo mir eigentlech immer furt si isch eigentlech bekannt aus "tunten-schuppen".. jo froget nech nume, aber dert isch am meischte party gsi, am lengschte offe, aus am billigschte und de isch haut ab u zue wider so eini/eine?? imne sametchleidli cho z loufe.. ou egau :) de hez natürlech no zauriichi pubs und angeri clubs gha.. meischtens isch me aber eh vom einte zum angere... i hami aber natürli nid nume mit trinke und feschte beschäftiget! nei, mini houselady het mi ou kulturell witerbiudet! (für die wos nid intressiert de nachfougend abschnitt eifach überspringe!) i bi uf ilkley, dert heisi es grosses schööns moor, oder vili chlini weiss doch ou nid, mit viiiu schoof (wi überau wos chli grüen isch in england)... und dert heisi ou jeglechi änglischi schnulzene gfiumet, woni natürli ou aui gluegt ha am fritti aabe mit mire lady! (für die wo sech das ou wei aatue: women of substance) witer bini ou uf blackpool, dasch ar einte site vor insle am meer. dert bini nur i zoo :) auso nid so kulturell! und am aabe bini de ad küschte und dert heisi `illuminations` gha... sehr beiidruckend! am ganze strand entang hez riisigi (und weni meine riisig ischs minimum dopplet so gross wi ig und achtmou so breit) lüchtfigüürli gha... vo ronald mcdonald über tanzendi froue im baschtröckli bis zumne lüüchtende fishermensfriend-tram hez aus gha! und in whitby bini ou no gsi.. dasch ar angere site vor insle und ou am meer... (auso nid nord-süüd mässig sondern vo leeds usgseh wescht-oscht mässig :) !) dert sig schiins der ursprung vom gotische.. (auso i due de do nume nochebhoupte, faus öpper öppis besser weis...) uf jede loufe si dert würk aui immer no so ume, öb chli oder gross jung oder aut, aui! d froue ebe so i gorrsaasche mit schirmli und riise röck, d manne im frack, mitem galsding-wome-vor-z`oug-het im schileetäschli undem zyliner?! und stock... eifach toll :) und de hez natürli no chli angeri freaks wo s ganze chli übertribe wi überau in england... witer bini i däm fischerdörfli e "damf-bus" gfahre. und glaube oder lass es sein, der fahrer vo däm damfding isch dä gsi wo im harry potter fium der damfzug isch gfahre :)
de bini ou no in york gsi, dasch sones typisch englisches stdädtli.. es het es riise schöns münschter und viu chlini gässli. dert spinne si voukomme, es het e laade wo s ganz jahr wiehnachte isch... isch auso no kimisch gsi im oktober neume ine und "tschingel bells" ghöre...und de bini natürli ou no es paar mau in london gsi, aber dasch weniger intressant, dert hani ou nume gfeschtet und g-schoppet :)
und nun bini sitem 21.nov wider diheime: "WISO ISCH SI DE DIE NIE IZ ÜEBE CHO???"
jo es het sech so ergää i mire zit in ängland, dasme sech mau het gedanke gmacht: was machi när zum mis schöggele witerfüere und mi het sech haut ou mau beworbe. iz schaffeni de abem 16.dez ire jugendherberge in scuol, im wunderschöne engadin. dert muesi häufe zmorge und znacht mache und düre tag darfi go boarde :) i ha dert es wunderschöns studio mit eme riise baukon wo scho 30cm schnee het :) sit ruhig chli niidisch! :)i probiere natürlech dert aui mini freitage so aazordne dasi a aaläss wi x-mas-party, würgerbau, vorfasnacht etc cha derbii si!! zwüsche der zit in england und scuol bini am zügle und am ruume diheime.. i bi auso nid e komischi wo eifach nümme chunnt und nüt seit, sondern freue mi nach wi vor riisig uf d fasnacht und euch aui wider einisch z gseh!!! xoxo (hugs and kisses in englischer churzversion)
euchi tina
Bilder zur Story...
Keine Kommentare:
Kommentar veröffentlichen